Poetry محسن نقوی

[Sexy_dick_lhr]

میں جو مہکا تو میری شاخ جلا دی اس نے​

سبز موسم میں مجھے زرد ہوا دی اس نے​

​

پہلے ایک لمحے کی زنجیر سے باندھا مجھ کو​

اور پھر وقت کی رفتار بڑھا دی اس نے​

​

میری ناکام محبت مجھے واپس کر دی​

یوں مرے ہاتھ، میری لاش تھما دی اس نے​

​

جانتا تھا کے مجھے موت سکون بخشے گی​

وہ ستمگر تھا سو جینے کی دعا دی اس نے​

​

اس کے ہونے سے تھی سانسیں میری دگنی محسن​

وہ جو بچھڑا تو میری عمر گھٹا دی اس نے​

 

[Sexy_dick_lhr]

پاگل آنکھوں والی لڑکی​

اتنے مہنگے خواب نہ دیکھو​

تھک جاؤ گی​

​

کانچ سے نازک خواب تمہارے​

ٹوٹ گئے تو​

پچھتاؤ گی​

​

سوچ کا سارا اجلا کندن​

ضبط کی راکھ میں گھل جائے گا​

کچے پکے رشتوں کی خوشبو کا ریشم​

کھل جائے گا​

​

تم کیا جانو​

خواب سفر کی دھوپ کے تیشے​

خواب ادھوری رات کا دوزخ​

خواب خیالوں کا پچھتاوا​

خوابوں کی منزل رسوائی​

خوابوں کا حاصل تنہائی​

​

تم کیا جانو​

مہنگے خواب خریدنا ہوں تو​

آنکھیں بیچنا پڑتی ہیں یا​

رشتے بھولنا پڑتے ہیں​

اندیشوں کی ریت نہ پھانکو​

​

پیاس کی اوٹ سراب نہ دیکھو​

اتنے مہنگے خواب نہ دیکھو​

​

تھک جاؤ گی​

 

[Sexy_dick_lhr]

کسی کے دور جانے سے​

تعلق ٹوٹ جانے سے​

​

کسی کے مان جانے سے​

کسی کے روٹھ جانے سے​

​

مجھے اب ڈر نہیں لگتا​

کسی کو آزمانے سے​

​

کسی کے آزمانے سے​

کسی کو یاد رکھنے سے​

​

کسی کو بھول جانے سے​

مجھے اب ڈر نہیں لگتا​

​

کسی کو چھوڑ دینے سے​

کسی کے چھوڑ جانے سے​

​

نا شمع کو جلانے سے​

نا شمع کو بجھانے سے​

​

مجھے اب ڈر نہیں لگتا​

اکیلے مسکرانے سے​

​

کبھی آنسو بہانے سے​

نا اس سارے زمانے سے​

​

حقیقت سے فسانے سے​

مجھے اب ڈر نہیں لگتا​

​

کسی کی نارسائی سے​

کسی کی پارسائی سے​

​

کسی کی بے وفائی سے​

کسی دکھ انتہائی سے​

​

مجھے اب ڈر نہیں لگتا​

نا تو اس پار رہنے سے​

​

نا تو اس پار رہنے سے​

نا اپنی زندگانی سے​

​

نا اک دن موت آنے سے​

مجھے اب ڈر نہیں لگتا​

 

[Sexy_dick_lhr]

وہ تو یوں تھا کہ ہم​

اپنی اپنی ضرورت کی خاطر​

اپنے اپنے تقاضوں کو پورا کیا​

​

اپنے اپنے ارادوں کی تکمیل میں​

تیرہ و تار خواہش کی سنگلاخ راہوں پہ چلتے رہے​

پھر بھی راہوں میں کتنے شگوفے کھلے​

وہ تو یوں تھا کہ بڑھتے گئے سلسلے​

​

ورنہ یوں ہے کہ ہم​

اجنبی کل بھی تھے​

اجنبی اب بھی ہیں​

​

اب بھی یوں ہے کہ تم​

ہر قسم توڑ دو​

سب ضدیں چھوڑ دو​

​

اور اگر یوں نہ تھا تو یوں ہی سوچ لو​

تم نے اقرار ہی کب کیا تھا کہ میں​

تم سے منسوب ہوں​

میں نے اصرار ہی کب کیا تھا کہ تم​

​

یاد آؤ مجھے​

بھول جاؤ مجھے​

 

[Sexy_dick_lhr]

یہ پچھلے عشق کی باتیں ہیں​

​

جب آنکھ میں خواب دمکتے تھے​

جب دلوں میں داغ چمکتے تھے​

​

جب پلکیں شہر کے رستوں میں​

اشکوں کا نور لٹاتی تھیں​

​

جب سانسیں اجلے چہروں کی​

تن من میں پھول سجاتی تھیں​

​

جب چاند کی رم جھم کرنوں سے​

سوچوں میں بھنور پڑ جاتے تھے​

​

جب ایک تلاطم رہتا تھا​

اپنے بے انت خیالوں میں​

​

ہر عہد نبھانے کی قسمیں​

خط خون سے لکھنے کی رسمیں​

​

جب عام تھیں ہم دل والوں میں​

اب اپنے پھیکے ہونٹوں پر​

​

کچھ جلتے بجھتے لفظوں کے​

​

یاقوت پگھلتے رہتے ہیں​

اب اپنی گم سم آنکھوں میں​

​

کچھ دھول ہے بکھری یادوں کی​

​

کچھ گرد آلود سے موسم ہیں​

اب دھوپ اگلتی سوچوں میں​

​

کچھ پیماں جلتے رہتے ہیں​

اب اپنے ویراں آنگن میں​

​

جتنی صبحوں کی چاندی ہے​

جتنی شاموں کا سونا ہے​

اس کو خاکستر ہونا ہے​

​

اب یہ باتیں رہنے دیجے​

جس عمر میں قصے بنتے تھے​

اس عمر کا غم سہنے دیجے​

​

اب اپنی اجڑی آنکھوں میں​

جتنی روشن سی راتیں ہیں​

اس عمر کی سب سوغاتیں ہیں​

​

جس عمر کے خواب خیال ہوئے​

​

وہ پچھلی عمر تھی بیت گئی​

وہ عمر بتائے سال ہوئے​

اب اپنی دید کے رستے میں​

کچھ رنگ ہے گزرے لمحوں کا​

​

کچھ اشکوں کی باراتیں ہیں​

کچھ بھولے بسرے چہرے ہیں​

کچھ یادوں کی برساتیں ہیں​

​

یہ پچھلے عشق کی باتیں ہیں​

 

[Sexy_dick_lhr]

محبتوں پہ بہت اعتماد کیا کرنا​

بُھلا چکے ہیں اُسے پھر سے یاد کیا کرنا​

​

وہ بے وفا ہی سہی اُس پہ تہمتیں کیسی​

ذرا سی بات پہ اتنا فساد کیا کرنا​

​

کچھ اس لیے بھی میں پسپا ہوا ہوں مقتل سے​

کہ بہرِ مالِ غنیمت جہاد کیا کرنا​

​

نگاہ میں جو اُترتا ہے دل سے کیوں اُترے​

دل و نگاہ میں پیدا تضاد کیا کرنا​

​

میں اس لیے اُسے اب تک چھو نہ سکا "محسن"​

وہ آہیٔنہ ہے اُسے سنگ زاد کیا کرنا​

 

[Sexy_dick_lhr]

میں نے اکثر خواب میں دیکھا​

خوف تراشے کہساروں کی گود میں جیسے​

​

اک پتھریلی قبر بنی ہے​

قبر کی اجلی پیشانی پر​

دھندلے میلے شیشے کی تختی کے پیچھے​

تیرا نام لکھا ہے​

​

تیرا میرا نام کہ جس میں​

شیشے پتھر جیسی کوئی بات نہیں ہے​

تیری شہرت میں بھی​

میری رسوائی کا ہات نہیں ہے​

پھر بھی​

سوچو​

​

میں نے اکثر خواب میں دیکھا​

 

[Sexy_dick_lhr]

یہ تیری جھیل سی آنکھوں میں رتجگوں کے بھنور​

یہ تیرے پھول سے چہرے پہ چاندنی کی پھوار​

یہ تیرے لب یہ دیار یمن کے سرخ عقیق​

یہ آئنے سی جبیں سجدہ گاہ لیل و نہار​

​

یہ بے نیاز گھنے جنگلوں سے بال ترے​

یہ پھولتی ہوئی سرسوں کا عکس گالوں پر​

یہ دھڑکنوں کی زباں بولتے ہوئے آبرو​

کمند ڈال رہے ہیں مرے خیالوں پر​

تری جبیں پہ اگر حادثوں کے نقش ابھریں​

مزاج گردش دوراں بھی لڑکھڑا جائے​

تو مسکرائے تو صبحیں تجھے سلام کریں​

تو رو پڑے تو زمانے کی آنکھ بھر آئے​

​

مگر میں شہر حوادث کے سنگ زادوں سے​

یہ آئنے سا بدن کس طرح بچاؤں‌ گا​

مجھے یہ ڈر ہے کسی روز تیرے قرب سمیت​

میں خود بھی دکھ کے سمندر میں ڈوب جاؤں گا​

 

[Sexy_dick_lhr]

مری گلی کے غلیظ بچو​

تم اپنے میلے بدن کی ساری غلاظتوں کو ادھار سمجھو​

تمہاری آنکھیں​

اداسیوں سے بھری ہوئی ہیں​

ازل سے جیسے ڈری ہوئی ہیں​

​

تمہارے ہونٹوں پہ پیڑھیوں کی جمی ہوئی تہہ یہ کہہ رہی ہے​

حیات کی آب جو پس پشت بہہ رہی ہے​

​

تمہاری جیبیں منافقت سے اٹی ہوئی ہیں​

سبھی قمیصیں پھٹی ہوئی ہیں​

تمہاری پھیکی ہتھیلیوں کی بجھی لکیریں​

بقا کی ابجد سے اجنبی ہیں​

تمہاری قسمت کی آسمانی نشانیاں اب خطوط وحدانیت کا مقسوم ہو رہی ہیں​

نظر سے معدوم ہو رہی ہیں​

​

مری گلی کے غلیظ بچو​

تمہارے ماں باپ نے تمدن کا قرض لے کر​

​

تمہاری تہذیب بیچ دی ہے​

تمہارا استاد اپنی ٹوٹی ہوئی چھڑی لے کے چپ کھڑا ہے​

کہ اس کے سوکھے گلے میں نان جویں کا ٹکڑا اڑا ہوا ہے​

​

مری گلی کے غلیظ بچو​

​

تمہارے میلے بدن کی ساری غلاظتیں اب گئے زمانوں کے ارمغاں ہیں​

تمہارے ورثے کی داستاں ہیں​

انہیں سنبھالو​

کہ آنے والا ہر ایک لمحہ تمہارے جھڑتے ہوئے پپوٹوں سے جانے والے دنوں دنوں کی اتار لے گا​

مری گلی کے غلیظ بچو​

​

ضدوں کو چھوڑو​

قریب آؤ​

​

رتوں کی نفرت کو پیار سمجھو​

خزاں کو رنگ بہار سمجھو​

غلاظتوں کو ادھار سمجھو​

 

[Haris1234]

Wah boht khoob or dil ko chone wali poetry zabardast