احمد فراز

[alone_leo82]

گماں یہی ہے کہ دل خود ادھر کو جاتا ہے​

احمد فراز​

​

گماں یہی ہے کہ دل خود ادھر کو جاتا ہے ​

​

سو شک کا فائدہ اس کی نظر کو جاتا ہے ​

​

حدیں وفا کی بھی آخر ہوس سے ملتی ہیں ​

​

یہ راستہ بھی ادھر سے ادھر کو جاتا ہے ​

​

یہ دل کا درد تو عمروں کا روگ ہے پیارے ​

​

سو جائے بھی تو پہر دو پہر کو جاتا ہے ​

​

یہ حال ہے کہ کئی راستے ہیں پیش نظر ​

​

مگر خیال تری رہگزر کو جاتا ہے ​

​

تو انوریؔ ہے نہ غالبؔ تو پھر یہ کیوں ہے فرازؔ ​

​

ہر ایک سیل بلا تیرے گھر کو جاتا ہے​

 

[alone_leo82]

ہوا کے زور سے پندار بام و در بھی گیا​

احمد فراز​

​

ہوا کے زور سے پندار بام و در بھی گیا ​

​

چراغ کو جو بچاتے تھے ان کا گھر بھی گیا ​

​

پکارتے رہے محفوظ کشتیوں والے ​

​

میں ڈوبتا ہوا دریا کے پار اتر بھی گیا ​

​

اب احتیاط کی دیوار کیا اٹھاتے ہو ​

​

جو چور دل میں چھپا تھا وہ کام کر بھی گیا ​

​

میں چپ رہا کہ اسی میں تھی عافیت جاں کی ​

​

کوئی تو میری طرح تھا جو دار پر بھی گیا ​

​

سلگتے سوچتے ویران موسموں کی طرح ​

​

کڑا تھا عہد جوانی مگر گزر بھی گیا ​

​

جسے بھلا نہ سکا اس کو یاد کیا رکھتا ​

​

جو نام لب پہ رہا ذہن سے اتر بھی گیا ​

​

پھٹی پھٹی ہوئی آنکھوں سے یوں نہ دیکھ مجھے ​

​

تجھے تلاش ہے جس شخص کی وہ مر بھی گیا ​

​

مگر فلک کو عداوت اسی کے گھر سے تھی ​

​

جہاں فرازؔ نہ تھا سیل غم ادھر بھی گیا​

 

[alone_leo82]

یوں تو پہلے بھی ہوئے اس سے کئی بار جدا​

احمد فراز​

​

یوں تو پہلے بھی ہوئے اس سے کئی بار جدا ​

​

لیکن اب کے نظر آتے ہیں کچھ آثار جدا ​

​

گر غم سود و زیاں ہے تو ٹھہر جا اے جاں ​

​

کہ اسی موڑ پہ یاروں سے ہوئے یار جدا ​

​

دو گھڑی اس سے رہو دور تو یوں لگتا ہے ​

​

جس طرح سایۂ دیوار سے دیوار جدا ​

​

یہ جدائی کی گھڑی ہے کہ جھڑی ساون کی ​

​

میں جدا گریہ کناں ابر جدا یار جدا ​

​

کج کلاہوں سے کہے کون کہ اے بے خبروں ​

​

طوق گردن سے نہیں طرۂ دستار جدا ​

​

کوئے جاناں میں بھی خاصا تھا طرح دار فرازؔ ​

​

لیکن اس شخص کی سج دھج تھی سر دار جدا​

 

[alone_leo82]

دل منافق تھا شب ہجر میں سویا کیسا​

احمد فراز​

​

دل منافق تھا شب ہجر میں سویا کیسا ​

​

اور جب تجھ سے ملا ٹوٹ کے رویا کیسا ​

​

زندگی میں بھی غزل ہی کا قرینہ رکھا ​

​

خواب در خواب ترے غم کو پرویا کیسا ​

​

اب تو چہروں پہ بھی کتبوں کا گماں ہوتا ہے ​

​

آنکھیں پتھرائی ہوئی ہیں لب گویا کیسا ​

​

دیکھ اب قرب کا موسم بھی نہ سرسبز لگے ​

​

ہجر ہی ہجر مراسم میں سمویا کیسا ​

​

ایک آنسو تھا کہ دریائے ندامت تھا فرازؔ ​

​

دل سے بے باک شناور کو ڈبویا کیسا​

 

[Sexy_dick_lhr]

Bahtreen update hai
tamam shaer bht kamal hain

 

[alone_leo82]

جان سے عشق اور جہاں سے گریز​

احمد فراز​

​

جان سے عشق اور جہاں سے گریز ​

​

دوستوں نے کیا کہاں سے گریز ​

​

ابتدا کی تیرے قصیدے سے ​

​

اب یہ مشکل کروں کہاں سے گریز ​

​

میں وہاں ہوں جہاں جہاں تم ہو ​

​

تم کرو گے کہاں کہاں سے گریز ​

​

کر گیا میرے تیرے قصے میں ​

​

داستاں گو یہاں وہاں سے گریز ​

​

جنگ ہاری نہ تھی ابھی کہ فرازؔ ​

​

کر گئے دوست درمیاں سے گریز​

 

[alone_leo82]

کہا تھا کس نے کہ عہد وفا کرو اس سے​

احمد فراز​

​

کہا تھا کس نے کہ عہد وفا کرو اس سے ​

​

جو یوں کیا ہے تو پھر کیوں گلہ کرو اس سے ​

​

نصیب پھر کوئی تقریب قرب ہو کہ نہ ہو ​

​

جو دل میں ہوں وہی باتیں کہا کرو اس سے ​

​

یہ اہل بزم تنک حوصلہ سہی پھر بھی ​

​

ذرا فسانۂ دل ابتدا کرو اس سے ​

​

یہ کیا کہ تم ہی غم ہجر کے فسانے کہو ​

​

کبھی تو اس کے بہانے سنا کرو اس سے ​

​

فرازؔ ترک تعلق تو خیر کیا ہوگا ​

​

یہی بہت ہے کہ کم کم ملا کرو اس سے​

 

[alone_leo82]

وہ دشمن جاں جان سے پیارا بھی کبھی تھا​

احمد فراز​

​

وہ دشمن جاں جان سے پیارا بھی کبھی تھا ​

​

اب کس سے کہیں کوئی ہمارا بھی کبھی تھا ​

​

اترا ہے رگ و پے میں تو دل کٹ سا گیا ہے ​

​

یہ زہر جدائی کہ گوارا بھی کبھی تھا ​

​

ہر دوست جہاں ابر گریزاں کی طرح ہے ​

​

یہ شہر کبھی شہر ہمارا بھی کبھی تھا ​

​

تتلی کے تعاقب میں کوئی پھول سا بچہ ​

​

ایسا ہی کوئی خواب ہمارا بھی کبھی تھا ​

​

اب اگلے زمانے کے ملیں لوگ تو پوچھیں ​

​

جو حال ہمارا ہے تمہارا بھی کبھی تھا ​

​

ہر بزم میں ہم نے اسے افسردہ ہی دیکھا ​

​

کہتے ہیں فرازؔ انجمن آرا بھی کبھی تھا​

 

[alone_leo82]

یہ شہر سحر زدہ ہے صدا کسی کی نہیں​

احمد فراز​

​

یہ شہر سحر زدہ ہے صدا کسی کی نہیں ​

​

یہاں خود اپنے لیے بھی دعا کسی کی نہیں ​

​

خزاں میں چاک گریباں تھا میں بہار میں تو ​

​

مگر یہ فصل ستم آشنا کسی کی نہیں ​

​

سب اپنے اپنے فسانے سناتے جاتے ہیں ​

​

نگاہ یار مگر ہم نوا کسی کی نہیں ​

​

میں آج زد پہ اگر ہوں تو خوش گمان نہ ہو ​

​

چراغ سب کے بجھیں گے ہوا کسی کی نہیں ​

​

فرازؔ اپنی جگر کاویوں پہ ناز نہ کر ​

​

کہ یہ متاع ہنر بھی سدا کسی کی نہیں​

 

[alone_leo82]

خود کو ترے معیار سے گھٹ کر نہیں دیکھا​

احمد فراز​

​

خود کو ترے معیار سے گھٹ کر نہیں دیکھا ​

​

جو چھوڑ گیا اس کو پلٹ کر نہیں دیکھا ​

​

میری طرح تو نے شب ہجراں نہیں کاٹی ​

​

میری طرح اس تیغ پہ کٹ کر نہیں دیکھا ​

​

تو دشنۂ نفرت ہی کو لہراتا رہا ہے ​

​

تو نے کبھی دشمن سے لپٹ کر نہیں دیکھا ​

​

تھے کوچۂ جاناں سے پرے بھی کئی منظر ​

​

دل نے کبھی اس راہ سے ہٹ کر نہیں دیکھا ​

​

اب یاد نہیں مجھ کو فرازؔ اپنا بھی پیکر ​

​

جس روز سے بکھرا ہوں سمٹ کر نہیں دیکھا​