امجد اسلام امجد

[alone_leo82]

تمہارا ہاتھ جب میرے لرزتے ہاتھ سے چھوٹا خزاں کے آخری دن تھے​

امجد اسلام امجد​

​

تمہارا ہاتھ جب میرے لرزتے ہاتھ سے چھوٹا خزاں کے آخری دن تھے ​

​

وہ محکم بے لچک وعدہ کھلونے کی طرح ٹوٹا خزاں کے آخری دن تھے ​

​

بہار آئی نہ تھی لیکن ہواؤں میں نئے موسم کی خوشبو رقص کرتی تھی ​

​

اچانک جب کہا تم نے مرے منہ پر مجھے جھوٹا خزاں کے آخری دن تھے ​

​

وہ کیا دن تھے یہیں ہم نے بہاروں کی دعا کی تھی کسی نے بھی نہیں سوچا ​

​

چمن والوں نے مل کر جب خود اپنا ہی چمن لوٹا خزاں کے آخری دن تھے ​

​

لکھا تھا ایک تختی پر کوئی بھی پھول مت توڑے مگر آندھی تو ان پڑھ تھی ​

​

سو جب وہ باغ سے گزری کوئی اکھڑا کوئی ٹوٹا خزاں کے آخری دن تھے ​

​

بہت ہی زور سے پیٹے ہوا کے بین پر سینے ہمارے خیر خواہوں نے ​

​

کہ چاندی کے ورق جیسا سمے نے جب ہمیں کوٹا خزاں کے آخری دن تھے ​

​

نہ رت تھی آندھیوں کی یہ نہ موسم تھا ہواؤں کا تو پھر یہ کیا ہوا امجدؔ ​

​

ہر اک کونپل ہوئی زخمی ہوا مجروح ہر بوٹا خزاں کے آخری دن تھ​

 

[alone_leo82]

صدیاں جن میں زندہ ہوں وہ سچ بھی مرنے لگتے ہیں​

امجد اسلام امجد​

​

صدیاں جن میں زندہ ہوں وہ سچ بھی مرنے لگتے ہیں ​

​

دھوپ آنکھوں تک آ جائے تو خواب بکھرنے لگتے ہیں ​

​

انسانوں کے روپ میں جس دم سائے بھٹکیں سڑکوں پر ​

​

خوابوں سے دل چہروں سے آئینے ڈرنے لگتے ہیں ​

​

کیا ہو جاتا ہے ان ہنستے جیتے جاگتے لوگوں کو ​

​

بیٹھے بیٹھے کیوں یہ خود سے باتیں کرنے لگتے ہیں ​

​

عشق کی اپنی ہی رسمیں ہیں دوست کی خاطر ہاتھوں میں ​

​

جیتنے والے پتے بھی ہوں پھر بھی ہرنے لگتے ہیں ​

​

دیکھے ہوئے وہ سارے منظر نئے نئے دکھلائی دیں ​

​

ڈھلتی عمر کی سیڑھی سے جب لوگ اترنے لگتے ہیں ​

​

بیداری آسان نہیں ہے آنکھیں کھلتے ہی امجدؔ ​

​

قدم قدم ہم سپنوں کے جرمانے بھرنے لگتے ہیں​

 

[alone_leo82]

زندگی درد بھی دوا بھی تھی​

امجد اسلام امجد​

​

زندگی درد بھی دوا بھی تھی ​

​

ہم سفر بھی گریز پا بھی تھی ​

​

کچھ تو تھے دوست بھی وفا دشمن ​

​

کچھ مری آنکھ میں حیا بھی تھی ​

​

دن کا اپنا بھی شور تھا لیکن ​

​

شب کی آواز بے صدا بھی تھی ​

​

عشق نے ہم کو غیب دان کیا ​

​

یہی تحفہ یہی سزا بھی تھی ​

​

گرد باد وفا سے پہلے تک ​

​

سر پہ خیمہ بھی تھا ردا بھی تھی ​

​

ماں کی آنکھیں چراغ تھیں جس میں ​

​

میرے ہمراہ وہ دعا بھی تھی ​

​

کچھ تو تھی رہ گزر میں شمع طلب ​

​

اور کچھ تیز وہ ہوا بھی تھی ​

​

بے وفا تو وہ خیر تھا امجدؔ ​

​

لیکن اس میں کہیں وفا بھی تھی​

 

[alone_leo82]

دل کے دریا کو کسی روز اتر جانا ہے​

امجد اسلام امجد​

​

دل کے دریا کو کسی روز اتر جانا ہے ​

​

اتنا بے سمت نہ چل لوٹ کے گھر جانا ہے ​

​

اس تک آتی ہے تو ہر چیز ٹھہر جاتی ہے ​

​

جیسے پانا ہی اسے اصل میں مر جانا ہے ​

​

بول اے شام سفر رنگ رہائی کیا ہے ​

​

دل کو رکنا ہے کہ تاروں کو ٹھہر جانا ہے ​

​

کون ابھرتے ہوئے مہتاب کا رستہ روکے ​

​

اس کو ہر طور سوئے دشت سحر جانا ہے ​

​

میں کھلا ہوں تو اسی خاک میں ملنا ہے مجھے ​

​

وہ تو خوشبو ہے اسے اگلے نگر جانا ہے ​

​

وہ ترے حسن کا جادو ہو کہ میرا غم دل ​

​

ہر مسافر کو کسی گھاٹ اتر جانا ہے​

 

[Kgan123]

بہت خوب جناب کیا انداز بیان ہے زبردست

 

[alone_leo82]

اگرچہ کوئی بھی اندھا نہیں تھا​

امجد اسلام امجد​

​

اگرچہ کوئی بھی اندھا نہیں تھا ​

​

لکھا دیوار کا پڑھتا نہیں تھا ​

​

کچھ ایسی برف تھی اس کی نظر میں ​

​

گزرنے کے لئے رستہ نہیں تھا ​

​

تمہی نے کون سی اچھائی کی ہے ​

​

چلو مانا کہ میں اچھا نہیں تھا ​

​

کھلی آنکھوں سے ساری عمر دیکھا ​

​

اک ایسا خواب جو اپنا نہیں تھا ​

​

میں اس کی انجمن میں تھا اکیلا ​

​

کسی نے بھی مجھے دیکھا نہیں تھا ​

​

سحر کے وقت کیسے چھوڑ جاتا ​

​

تمہاری یاد تھی سپنا نہیں تھا ​

​

کھڑی تھی رات کھڑکی کے سرہانے ​

​

دریچے میں وہ چاند اترا نہیں تھا ​

​

دلوں میں گرنے والے اشک چنتا ​

​

کہیں اک جوہری ایسا نہیں تھا ​

​

کچھ ایسی دھوپ تھی ان کے سروں پر ​

​

خدا جیسے غریبوں کا نہیں تھا ​

​

ابھی حرفوں میں رنگ آتے کہاں سے ​

​

ابھی میں نے اسے لکھا نہیں تھا ​

​

تھی پوری شکل اس کی یاد مجھ کو ​

​

مگر میں نے اسے دیکھا نہیں تھا ​

​

برہنہ خواب تھے سورج کے نیچے ​

​

کسی امید کا پردا نہیں تھا ​

​

ہے امجدؔ آج تک وہ شخص دل میں ​

​

کہ جو اس وقت بھی میرا نہیں تھا​

 

[alone_leo82]

سینکڑوں ہی رہنما ہیں راستہ کوئی نہیں​

امجد اسلام امجد​

​

سینکڑوں ہی رہنما ہیں راستہ کوئی نہیں ​

​

آئنے چاروں طرف ہیں دیکھتا کوئی نہیں ​

​

سب کے سب ہیں اپنے اپنے دائرے کی قید میں ​

​

دائروں کی حد سے باہر سوچتا کوئی نہیں ​

​

صرف ماتم اور زاری سے ہی جس کا حل ملے ​

​

اس طرح کا تو کہیں بھی مسئلہ کوئی نہیں ​

​

یہ جو سائے سے بھٹکتے ہیں ہمارے ارد گرد ​

​

چھو کے ان کو دیکھیے تو واہمہ کوئی نہیں ​

​

جو ہوا یہ درج تھا پہلے ہی اپنے بخت میں ​

​

اس کا مطلب تو ہوا کہ بے وفا کوئی نہیں ​

​

تیرے رستے میں کھڑے ہیں صرف تجھ کو دیکھنے ​

​

مدعا پوچھو تو اپنا مدعا کوئی نہیں ​

​

کن‌ فکاں کے بھید سے مولیٰ مجھے آگاہ کر ​

​

کون ہوں میں گر یہاں پر دوسرا کوئی نہیں ​

​

وقت ایسا ہم سفر ہے جس کی منزل ہے الگ ​

​

وہ سرائے ہے کہ جس میں ٹھہرتا کوئی نہیں ​

​

گاہے گاہے ہی سہی امجدؔ مگر یہ واقعہ ​

​

یوں بھی لگتا ہے کہ دنیا کا خدا کوئی نہی​

 

[alone_leo82]

اس نے آہستہ سے جب پکارا مجھے​

امجد اسلام امجد​

​

اس نے آہستہ سے جب پکارا مجھے ​

​

جھک کے تکنے لگا ہر ستارا مجھے ​

​

تیرا غم اس فشار شب و روز میں ​

​

ہونے دیتا نہیں بے سہارا مجھے ​

​

ہر ستارے کی بجھتی ہوئی روشنی ​

​

میرے ہونے کا ہے استعارا مجھے ​

​

اے خدا کوئی ایسا بھی ہے معجزہ ​

​

جو کہ مجھ پر کرے آشکارا مجھے ​

​

کوئی سورج نہیں کوئی تارا نہیں ​

​

تو نے کس جھٹپٹے میں اتارا مجھے ​

​

عکس امروز میں نقش دیروز میں ​

​

اک اشارا تجھے اک اشارا مجھے ​

​

ہیں ازل تا ابد ٹوٹتے آئنے ​

​

آگہی نے کہاں لا کے مارا مجھے​

 

[alone_leo82]

سائے ڈھلنے چراغ جلنے لگے​

امجد اسلام امجد​

​

سائے ڈھلنے چراغ جلنے لگے ​

​

لوگ اپنے گھروں کو چلنے لگے ​

​

اتنی پر پیچ ہے بھنور کی گرہ ​

​

جیسے نفرت دلوں میں پلنے لگے ​

​

دور ہونے لگی جرس کی صدا ​

​

کارواں راستے بدلنے لگے ​

​

اس کے لہجے میں برف تھی لیکن ​

​

چھو کے دیکھا تو ہاتھ جلنے لگے ​

​

اس کے بند قبا کے جادو سے ​

​

سانپ سے انگلیوں میں چلنے لگے ​

​

راہ گم کردہ طائروں کی طرح ​

​

پھر ستارے سفر پہ چلنے لگے ​

​

پھر نگاہوں میں دھول اڑتی ہے ​

​

عکس پھر آئنے بدلنے لگے​

 

[alone_leo82]

رات میں اس کشمکش میں ایک پل سویا نہیں​

امجد اسلام امجد​

​

رات میں اس کشمکش میں ایک پل سویا نہیں ​

​

کل میں جب جانے لگا تو اس نے کیوں روکا نہیں ​

​

یوں اگر سوچوں تو اک اک نقش ہے سینے پہ نقش ​

​

ہائے وہ چہرہ کہ پھر بھی آنکھ میں بنتا نہیں ​

​

کیوں اڑاتی پھر رہی ہے در بدر مجھ کو ہوا ​

​

میں اگر اک شاخ سے ٹوٹا ہوا پتا نہیں ​

​

آج تنہا ہوں تو کتنا اجنبی ماحول ہے ​

​

ایک بھی رستے نے تیرے شہر میں روکا نہیں ​

​

حرف برگ خشک بن کر ٹوٹتے گرتے رہے ​

​

غنچۂ عرض تمنا ہونٹ پر پھوٹا نہیں ​

​

درد کا رستہ ہے یا ہے ساعت روز حساب ​

​

سیکڑوں لوگوں کو روکا ایک بھی ٹھہرا نہیں ​

​

شبنمی آنکھوں کے جگنو کانپتے ہونٹوں کے پھول ​

​

ایک لمحہ تھا جو امجدؔ آج تک گزرا نہیں​